Канабисот не лекува рак, помага само за ублажување на симптомите, велат лекарите

Првите луѓе од клиниките за Онкологија, Хематологија, Пулмологија, едногласни – Не е научно докажано дека употребата на канабисот за медицински цели помага во лекувањето. Станува збор за пациенти кои се борат со малигните заболувања, и како што велат докторите, се фаќаат за сламка.

За да не се доведуваат пациентите во заблуда, докторите апелираат, маслото од канабис не е лек. Помага во ублажување на болките, чувството на непријатност, полесно надминување на тегобите од хемотерапијата.

Медицинската фела се согласила за легализација за употреба на маслото од канабис, но не и за негово одгледување.

Во аптеките во земјава може да се најде маслото од канабис, но за да се купи, потребно е согласност потпис од најмалку тројца специјалисти. Останува отворено прашањето, за што се користи производството на канабис наменето за медицински цели.

Марихуната која беше откриена според премиерот Мицкоски, е запленета поради одгледување на цвет кој не е соодветен за таа намена.

Владата на последната седница одлучи да почнат вонредните контроли во сите фирми кои имаат лиценци.

Марина Стојанова-Тонева