Duran Duran на 2 јули во Скопје
Легендарните хитмејкери ова лето доаѓаат во македонската метропола со концерт во арената „Борис Трајковски“, носејќи ги безвременските класици и најновиот материјал пред домашната публика.
Легендарниот британски бенд Duran Duran на 2 јули ќе одржи концерт во арена „Борис Трајковски“ во Скопје. Фановите ќе имаат можност во живо да ги слушнат хитовите „Hungry Like the Wolf“, „Rio“, „Come Undone“, „Girls on Film“, „Ordinary World“ и „Notorious“, како и песни од најновото издание „Danse Macabre“.
Со повеќе од 100 милиони продадени носачи на звук и кариера долга повеќе од четири децении, Duran Duran важат за еден од највлијателните состави на современата музичка сцена. Во 2022 година беа примени во Rock & Roll Hall of Fame и се добитници на бројни меѓународни награди, редовно настапувајќи како хедлајнери на најголемите светски фестивали.
Влезниците ќе бидат пуштени во продажба од 19 февруари во 10 часот онлајн и низ продажната мрежа во земјава. Организатор на концертот е Авалон продукција.