Премиерот најави можно членство во ЕУ идната година, со учество во сите тела, но без право на глас

Многу „ако“ за членството на Македонија во ЕУ. Премиерот Мицкоски обелодени дека можно е земјава да стане членка на Унијата во 2027-ма, со учество во сите тела, но без право на глас.

Од Владата појаснуваат:

„Процесот би бил дел од поширок пакет кој би ги опфатил и другите земји од регионот, во зависност од развојот на мировниот договор за Украина и политичкиот консензус во рамките на Унијата. Суштински, ова за Македонија би значело членство, но со ограничен капацитет во одлучувањето, постепена и условена интеграција и силен мониторинг до целосно усогласување со европскиот систем“.

Тука се наметнуваат и уставните измени. Процесот на пристапување е забавен, а напредокот во клучните области, особено владеењето на правото и борбата против корупцијата, е недоволен нагласува Томас Вајц, во годинешниот нацрт-извештај за земјава. Социјалдемократите пак коментираат дека власта ја турка Македонија во изолација.

Брисел пратил јасна порака дека проширувањето може да се забрза, но само со вистински реформи и владеење на правото велат во СДСМ.

Северна Македонија моментално се наоѓа во тешка позиција, бидејќи процесот на пристапување е сопрен. И покрај некои позитивни реформи, напредокот на реформската агенда на ЕУ – особено во клучни области како владеење на правото, реформите на правосудството и борба против корупцијата е недоволен.

Миле А. Ристески