Продолжува судењето за пожарот во дискотеката „Пулс“

Со сослушување нови сведоци, по предлог на Обвинителството, денеска во судницата во „Идризово“ продолжува судењето за пожарот во дискотеката „Пулс“ во Кочани, во кој загинаа 63 лица, а над 200 беа повредени.

На претходните рочишта сведочеа лица кои биле во објектот кобната вечер, опишувајќи паника и хаос откако избувнал пожарот. За денеска е најавено сослушување на уште пет сведоци.

Во воведниот збор, обвинителот Борче Јанев истакна дека процесот треба да утврди лична и институционална одговорност, нагласувајќи дека се бара правда за трагедијата. Обвинетите, пак, изјавија дека не се чувствуваат виновни, тврдејќи дека поседувале валидна документација и дека одговорноста е во институционални пропусти.

Пожарот избувна на 16 март 2025 година за време на настап на групата ДНК, при што, според обвинението, објектот работел незаконски, бил преполн, а биле користени и недозволени пиротехнички средства. Обвинети се над 30 физички и три правни лица.

Судењето го води судијката Диана Груевска Илиевска, а обвинителството го застапува тим од 15 јавни обвинители.