Тутунарите бараат повисоки откупни цени
Тутунарите ги отфрлаат понудените цени од откупувачите за новата реколта тутун. Понуденото е повеќе од непристојно. Но мора да ги склучуваат договорите и интересот за производство е зголемен. Битката за цени ќе трае и оваа година.
Не се согласуваме и ги отфрламе понудените цени на тутунот за новата реколта, реагираат од Сојузот на земјоделските здруженија. Тутунарите побараа 20-тина, а од откупувачите добија помалку од 5 проценти зголемени цени во договорите за новата реколта. Од досегашната 420 денари за прва класа, понудената цена е само 430 или 435 денари, револтирани се производителите.
На тутунарите законски им се врзани рацете за цените. Договорите мора да ги склучат, зашто никој нема да им го признае произведеното. Затоа бараат измени во законот и без потпис на Сојузот да не се склучуваат договори.
Тутунарите ќе произведат, интересот е зголемен, ама ќе ги користат сите можности до откупот да издејствуваат повисоки цени.
Ланската реколта тутун од преку 26.236 тони 98 проценти е откупена во прва класа.
Елизабета Митреска