10 тони опасен хемиски отпад со години чуван во руиниран објект на ИЈЗ

Десет тони опасен хемиски отпад, десет години се чувале во руиниран објект на Институтот за јавно здравје. Станува збор за исцедоци од лабораториски анализи, хемикалии од различен вид, лесно испарлив и запалив отпад. Отстранет е пред да предизвика хаварија, вели директорката на институтот Марија Андоновска.

Сериозен ризик за здравјето на луѓето и за безбедноста. 10 тони отпад бил складиран повеќе од една деценија во рамки на Институтот за јавно здравје и можел да предизвика хаварија. Бил многу лесно испарлив и запалив, поради што и претставувал голема потенцијална опасност.

Се работи за исцедоци од лабораториски анализи, хемикалии од различен вид и во различна агрегатна состојба. Директорката на Институтот за јавно здравје, Андоновска, очекува одговорност.

Во државата има многу вакви жаришта и опасноста од нив е многу голема, вели технологот Трајче Србиновски кој бил дел од тимот ангажиран за отстранување на отпадот.

По дислоцирање на отпадот, воспоставена е процедура и практика за идното управување и отстранување на ваков вид отпад, кој и понатаму ќе се создава во институтот.

Отпадот е изнесен и ќе се согорува надвор од државава.

Ана Јосифоска