Уапсен насилник кој пукал кон сопругата
Случаите на семејно насилство не се престануваат. Полицијата уапси 55 годишник од Скопје, осомничен дека во неговиот дом во Кисела Вода со пиштол пукал кон неговата 48-годишна сопруга, им се заканувал на трите ќерки и физички ја нападнал едната. Инцидентот се случил на 1-ви март, по претходна расправија...
Уапсен е скопјанецот, за кој постои сомнение дека со пиштол пукал кон сопругата во семејниот дом во Кисела Вода.
55-годишникот, наводно, најпрвин се заканувал на трите ќерки и сопругата, а потоа испукал куршум кон неа што завршил во прозорецот. Потоа, нападнал и една од ќерките.
Инцидентот бил пријавен во полиција 5 дена подоцна, кога тој повторно со пиштол се заканувал кон сопругата, но ќерките го спречиле во намерата да пука.
Министерството за внатрешни работи ги презема сите дејствија и по целосно документирање на случајот, против потенцијалниот насилник, ќе биде поднесена соодветна пријава.
Ова не е единствениот пријавен случај на семејно насилство во изминатото деноноќие.
Ресорниот министер, Панче Тошковски, информира дека во полициска станица е задржан уште еден потенцијален насилник, за кој ќе се постапува во соработка со Јавното обвинителство. Тој додава дека зголемениот број на пријави за семејно насилство, периодов може да е последица на охрабрувањето на жртвите и акцентот што медиумите го даваат на оваа проблематика, а за постигнување на саканиот ефект, од големо значење ќе бидат и брзите реакции на институциите.
Марија Котовска