Циклонот предизвика големи проблеми на Балканот, алармантно во Хрватска и Словенија

Невремето се уште предизвикува големи проблеми во регионот. Во моментов најалармантна е состојбата во Хрватска и Словенија, каде во некои делови е прогласена вонредна состојба. Нивото на реките и натаму расте. Меторолозите не се оптимисти.

Поројните дождови вчера ги земаа и првите жртви. 17-годишна девојка и 26-годишно момче загина од надојдената вода во местото Вранско во Словенија. Еден маж се води за исчезнат. Медиумите јавуваат дека неколку стотици куќи се под вода. Во прекин е сообраќајот а во некои делови нема ниту електрична енергија. Најкритични се реките Сава и Крка. Во руралните средини забележани се свлечишта. 

Сериозна е состојбата и во Хрватска. Според официјалните податоци 85 општини се во опасност од надојдената вода. Жителите со помош на војската вчера го одбранија Карловац, денеска Сисак е во опасност од налет на  воден бран, кој се очекува да го прогоди градот во текот на вечерните часови. Критична е состојбата и на северот од земјата. Каде покрај војската и граѓаните помагаат во евакуацијата и поставуваат насипи.  Поплавени се фабрики и автопати, проблеми има и во железничкиот сообраќај. 

„Правиме напори да ги спасиме луѓето и нивните домови. Даваме се од себе.“

„Одам во Кутина таму имам роднини, домот ми е цел под вода“, велат жителите на поплавените подрачја. 

Во Босна и Херцеговина се поплавени над 500 домови. Кризниот штаб соопшти дека во некои делови водата почнала да се повлекува но во Градишка е прогласен црвен аларм. Жителите се соочуваат со недостаток од  вода за пиење и храна. Невреме проследено со дожд и силен ветер се регистрирани и во Австрија и Унгарија.