Владата утре напладне ќе одржи вонредна седница, ќе се носат вонредни мерки за ценовниот удар
Владата утре напладне ќе одржи вонредна седница. Поради растот на цената на нафтата на светските берзи и очекувањата горивата в понеделник повторно да поскапат, ќе се носат мерки за ублажување на ценовниот удар. На повидок намалување на стапката на ДДВ. Итни мерки побара и опозицијата, која предупреди дека спиралата на раст на основните прехранбени производи е веќе започната...
Владата најави вонредни мерки за борба против високите цени на горивата. Оттаму посочуваат дека будно ја следат состојбата на цените на светските берзи, кои и натаму растат. И иако од „Илинденска“ не излегуваат со детали за какви мерки станува збор, не се отфрла можноста за моделот со намалување на стапката за ДДВ на горивата од 18% на 10%, како што претходно најави и премиерот Мицкоски.
СДСМ обвинува дека Владата не презема ништо за стабилизирање на ценовниот шок. Велат економијата тоне, секојдневно растат цените на основните производи, животниот стандард на граѓаните опаѓа.
„Владата на Мицкоски не презема ништо. Спиралата на раст на цените на храната започна. По маркетите се започнати поскапувањата, маслото за јадење е над 100 денари, јајцата над 300 денари, зеленчукот и овошјето над 100 денари за килограм, основните производи стануваат луксуз. Се најавува и ново покачување на цените на горивата. Потоа и да се стабилизираат цените на светските берзи цените во маркетите нема да се намалат“, велат од СДСМ.
Опозицијата прашува што се чека и кој профитира на грбот на народот.
Од понеделник нови цени на дизелот и бензините. По договор на Владата со еден од најголемите снабдувачи ОКТА, намалени се цените за 2 денари по литар па на најголемиот дел од бензинските цената е 90 денари за дизел и 84,5 за бензин.
Марина Стојанова-Тонева