Започна реконструкцијата на охридскиот аеродром
Започна реконструкцијата на охридскиот аеродром – прва по повеќе од седум децении. Инвестиција од 2,7 милиони евра, подобри услови. Проширени и модернизирани капацитети, што ќе придонесе за повеќе летови веќе од ова лето.
Започна реконструкција на охридскиот аеродром „Свети Апостол Павле“, прва од неговата изградба пред повеќе од 70 години. Станува збор за инвестиција од 2,7 милиони евра која ќе опфати обнова на терминалната зграда и изградба на нов административен објект.
Целта е модернизација на аеродромот, подобрување на условите за патниците и зголемување на капацитетите за повеќе авиолинии.
„Се работи за проширување на оперативниот капацитет на терминалот за 40%, проширување на капацитетите за пријавување на патници и багаж за 100 м2, со што просторот ќе се подобри и ќе биде поефикасен. Проширување на зоната за безбедносна контрола на патници и багаж. Административната зграда ќе се прошири, вели Неџат Курт, генерален директор на ТАВ Македонија“, изјави генералниот директор на ТАВ Македонија, Неџат Курт.
Премиерот Мицковски најави договор со нов тур-оператор кој ќе донесе половина милион ноќевања на охридското крајбрежје надвор од туристичката сезона.
„Анализите покажуваат, врз основа на досегашната соработка со овој тур-оператор, дека гостите кои тие ги носат дневно трошат, вклучително со сместување и останатите услуги, просечно околу 170 евра. Што значи дека надвор од сезоната имаме, само за туризмот и угостителството на охридското крајбрежје, приближно над 85 милиони евра, што сметам дека ќе биде додадена вредност за економијата во овој регион“, вели премиерот Христијан Мицковски.
Од денес стартува летниот распоред на летови, воведена е нова авиолинија Охрид – Милано. Од охридскиот аеродром ќе оперираат 8 авиокомпании до 17 дестинации.
„Имаме 24 нови дестинации од скопскиот и охридскиот аеродром, откако е избрана оваа влада. Почнуваат да се отвораат дестинации без субвенции, што значи дека политиката за правење на атрактивни овие два аеродроми веќе дала резултати. Компаниите отвораат нови линии и без државни субвенции“, изјави Александар Николоски, министер за транспорт.
Реконструкцијата ќе се реализира во рамки на концесискиот договор со операторот, а градежните зафати се очекува да завршат во јули годинава.
Соња Рилковска