Дебитантско славје на Кауфман-Абдерхалден

Во четвртиот женски спуст сезонава, во француски Вал Д Изер, триумфираше Швајцарката Маријане Кауфман-Абдерхалден. По двата пласмана на пиедесталот, од кои последниот во Лејк Луис пред три седмици, најголемиот успех досега во кариерата 27-годишната алпинка го оствари со време за 29 стотинки подобро од она на Словенката Тина Мазе. Ланската победничка во Светскиот Куп го забележа најдобриот резултат сезонава. Изненадувачки, третото место и припадна на малку познатата Австријка Корнелија Хитер, која заостана 52 стотинки и првпат се пласираше во Топ 3.

На тешката и комплексна патека во француското скијалиште, Американката Линдзи Вон мораше да застане во солзи поради болки во хронично повреденото колено. Тоа е загрижувачки за неа пред Олимписките Игри во Сочи, па заради претпазливост најави дека следен настап ќе има на брза трка дури во јануари. Германката Марија Хефл-Риш заврши деветта, а Швајцарката Лара Гут дури на 25.место.

По четири спуста во новата сезона, води Хефл-Риш со 269 бода, што е за 14 бода повеќе од денешната славеничка и за 55 бода повеќе од Тина Вајратер од Лихтенштајн. Во генералниот поредок на чело е Вајратер со 495 бода, само 5 повеќе од Хефл-Риш само 7 повеќе од Гут.

*

Спуст (ж) Вал Д Изер

1.Маријане Кауфман-Абдерхалден             ШВА  1:47.28

2.Тина Мазе                                                   СЛО    +0.29

3.Корнелија Хитер                                        АВС    +0.52

4.Тина Вајратер                                             ЛИХ   +0.63

5.Лоте Сејерштед                                          НОР    +0.94