Каматите на кредитите стабилни, депозитите со благ пад во февруари

Просечната каматна стапка на вкупните кредити во февруари годинава изнесува 4,73 проценти и се задржува на истото ниво како и претходниот месец, додека на годишна основа е намалена за 0,45 процентни поени, информира Народната банка. Истовремено, просечната каматна стапка на вкупните депозити бележи минимален месечен пад од 0,01 процентен поен и изнесува 2,19 проценти, без промена на годишно ниво.

Каматната стапка на новоодобрените кредити во февруари достигнува 4,69 проценти, што претставува раст и на месечно и на годишно ниво. Кај новопримените депозити, пак, е забележано месечно зголемување од 0,08 процентни поени, при што стапката изнесува 2,41 проценти.

Во корпоративниот сектор, каматната стапка на вкупните кредити останува стабилна на 4,35 проценти, но е пониска за 0,47 процентни поени на годишна основа. Каматите на новоодобрените корпоративни кредити бележат месечен раст и достигнуваат 4,62 проценти, главно како резултат на повисоките стапки кај денарските кредити без валутна клаузула и кредитите во странска валута.

Каматната стапка на вкупните депозити на корпоративниот сектор се зголемува на 2,73 проценти, додека кај новопримените депозити е регистриран поизразен месечен раст, на 2,49 проценти.

Кај домаќинствата, каматната стапка на вкупните кредити благо се намалува на 5,1 процент, а на годишна основа бележи пад од 0,43 процентни поени. Новоодобрените кредити за населението достигнуваат 4,76 проценти, со умерен месечен раст.

Од друга страна, каматната стапка на вкупните депозити на домаќинствата се намалува на 2,12 проценти, додека кај новопримените депозити е регистрирано мало зголемување на 2,38 проценти.

Од Народната банка посочуваат дека промените кај каматните стапки во февруари се должат на движењата кај денарските и девизните кредити и депозити, при што генералниот тренд упатува на стабилизација кај кредитите и минимални корекции кај депозитите.