Oд 1-ви септември ќе биде пуштена во сообраќај првата линија на „Градски воз“

Градскиот воз од Зелениково преку Драчево, Ново Лисиче, Кисела Вода, Аеродром до Железничката станица во Скопје ќе стартува од 1-ви септември, со брзини на некои делници од 80 до 90 километри на час, а релацијата според возниот ред ќе ја минува за 25 минути.

За другите две делници ќе биде распишан заеднички тендер, со што, како што појаснува вицепремиерот и министер за транспорт Николоски, ќе се скрати рокот на комплетно завршување на проектот „Градски воз“ за најмалку една година, односно, трите линии ќе бидат функционални на крајот на 2027-ма година.

Градоначалникот на Скопје, Ѓорѓиевски, вели дека паралелно тече и постапката за набавка на 100 нови автобуси за главниот град, а како дополнително унапредување го посочи и најавениот БРТ систем, за кој наскоро најави повеќе детали.

Од „Македонски железници – Инфраструктура“ информираа дека на терен се работи на замена на дрвените прагови на пругата со бетонски, а ќе се врши и реконструкција на постојните патни премини на трасата.

Проектот носи директни придобивки за секој граѓанин – побрзо движење, намален сообраќаен метеж и значително почист воздух, велат градските власти. Според нив, намалувањето на емисијата на штетни гасови ќе има позитивно влијание врз животната средина, но и врз здравјето.

Со подобрување на техничките карактеристики на пругата, се зголемува безбедноста во сообраќајот, се враќа проектираната брзина и се обезбедува стабилност на колосечната конструкција, дури и при зголемено оптоварување.

Игор Панов