Тече ултиматумот на Трамп за Ормускиот теснец

Претседателот Трамп вели дека Иран направил значаен чекор во преговорите пред истекот на ултиматумот, но предупреди дека тоа не е доволно добро. Шефот на Белата Куќа тврди дека му дал на Техеран продолжување на рокот за договор за премин на нафта низ Ормускиот теснец. Ултиматумот истекува денеска, во 20:00 часот источноевропско време.

„Некои велат тој нема план. Јас го имам најдобриот план од сите. Но, нема да ви кажам каков е. Тие сакаат да кажам, еве го мојот план, ќе нападнеме во 9:47 наутро, а потоа ќе го направиме ова или она. Овие луѓе овде знаат каков е планот. Не ми пречи да бидам навредуван“, изјави Доналд Трамп, претседател на САД.

Во меѓувреме, Иран вели дека формално го отфрлил предлогот на САД за прекин на огнот, додека повикува на дефинитивен крај на војната и споделија свои барања. Ирански функционер преку видеопорака ги повикува младите од Исламската Република да формираат човечки синџири околу електраните во земјата.

„Ги поканувам сите наши млади, спортисти, уметници, студенти, универзитетски студенти и професори. Утре, вторник во 14 часот околу електраните без разлика на вашата политичка гледна точка. Соберете се да му кажете на светот дека нападот врз јавната инфраструктура е воено злосторство“, изјави Алиреза Рахими, Врховен совет на млади и адолесценти.

Катарскиот премиер, шеикот Ал-Тани, во телефонски разговор со шефот на иранското МНР го изразил незадоволството од континуираните напади врз Катар и другите соседни земји. Доха го осудува таргетирањето на цивилна инфраструктура од која било страна.