Велика сабота – ден меѓу смртта и воскресението

Православните верници ги прават последните подготовки пред најголемиот христијански празник – Велигден. Денеска е Велика сабота – ден меѓу смртта и воскресението. Ова е втор ден на жалост, тага и молк, кога верниците се сеќаваат на христовото страдање.

„И токму поради тоа се вели, колку може повеќе да се воздржува човекот и од храна, од пијалоци и од зборување, да бидеме во молитвено расположение во кое ќе се воздржуваме од гревови и радосно ќе го дочекаме воскресението Христово. Денес е денот кога треба да се одадеме на молитва затоа што веруваме дека Христос бил во адот и победувајќи ја сатаната во недела наутро се отвораат рајските порти во кои секој човек може да се спаси и секоја човек да се здобие со вечен живот“, изјави отец Антонио.

Во православните храмови, верниците палеа свеќи за здравје и среќа. Со молитва ја очекуваат најрадосната вест за Христовото воскресение. Оние кои го практикувале седумнеделниот пост се причестија, подготвени духовно да го дочекаат празникот.

„Традицијата е оставена за да се практикува, да се зајакнува карактерот, верата, љубовта. Воскресението секоја година е најрадосниот миг затоа што тогаш животот ја победува смртта“.

„Се чувствувам исполнето, духовно. Сметам дека треба да сме луѓе, човечни, не само овие денови туку преку целата година. Верата и религијата се филозофија на животот, не траат само еден ден или еден празник“.

„Велигден е голем ден за православната црква. Дојдовме денеска да ги испочитуваме обичаите и традицијата на нашите дедовци, прабаби“.

Велигден е најголемиот христијански празник.

На полноќ со биењето на камбаните, воскресението христово ќе биде објавено во сите храмови на Македонската православна црква. Ќе се запазат и традицијата, кршење на вапсани јајца кои се симбол на животот.

Андријана Ѓурческа