Недостасува терапија за хемофилија
Во земјава има околу 300 хемофиличари покрај основната терапија, овие лица бараат од здравствените власти да набават современа, која делува подолго. Министерот за здравство вели дека тендерската постапка за набавка на лековите е при крај. Очекува за две недели да пристигнат...
Хемофиличарите во тишина го одбележуваат Светскиот ден – недостигот од терапија им го одзема нормалниот тек на живот и ги затвора во домовите. Цела година се соочуваат со недоволна количина на лекот кој и при мала повреда им помага да го запрат крвавењето. Покрај основната терапија, бараат од здравствените власти да набават современа која делува подолго.
„Цела 2025 бевме со намалена месечна потреба за обавување на сите животни работи, па повозрасните верувајте повеќето се во кревет, тие се со големи оштетувања по зглобови, тоа се неподносливи болки. Во немање на терапија во одредени градови луѓе кои веќе не можеа тие проблеми да ги поднесат се вратија на стариот третман на криопреципитат, а тој е веќе забранет да се користи во цел свет, вели Цветанка Наќевска – Здружение на пациенти со хемофилија.
Дел од факторите кои помагаат за згрутчување на крвта на хемофиличарите се обезбедени со донација, но сè уште не се стигнати до пациентите.
„Преразочарани сме од недостаток на терапија. Сакаме да се социјализираме, да живееме и државата да не сфати еднаш. И количината од тендерот што е распишана за 2026 година нема да биде доволна за да не покрие цела година без да имаме некој проблем. И ако не ја добиеме донацијата ќе имаме недостаток на терапија“, додава Наќевска.
Тендерската постапка за набавка на терапијата е при крај – вели министерот за здравство. Очекува за две недели лековите да пристигнат. Се бара решение и за надминување на административните пречки за еден од факторите кој е донација од Америка, за да можат пациентите да го користат.
„Тоа е заради законска неможност на Институтот за јавно здравје и на МАЛМЕД да дадат позитивно мислење за да може да им се даде на пациентите. Лекот е во земјата. Правиме напори да најдеме решение како можеме да го ставиме во употреба ако не ќе мора истиот да се врати“, изјави министерот за здравство, Азир Алиу.
Во земјава има околу 300 хемофиличари – кај овие лица крвта не може нормално да се згрутчува, крвавењето трае подолго, а може да биде ризик и при најмала повреда.
Андријана Ѓурческа