Пад од три места на Индексот за слобода на медиумите

Македонија падна за три места на Индексот за слобода на медиуми на „Репортери без граници“ и сега се наоѓа на 45-то место, со состојба оценета како проблематична.

Во извештајот е наведено дека, иако новинарите не работат во непријателска средина, сепак, широко распространетото дезинформирање и недостатокот на професионализам придонесуваат за пад на довербата во медиумите.

Се забележува и дека владини претставници имаат тенденција да имаат понижувачки став кон новинарите, критичкото новинарство е сè повеќе предмет на напади, стратешките тужби се користат за притисоци и заплашување, а постои и силна поларизација. Падот од три места е опомена, вели првиот човек на ЗНМ, Младен Чадиковски.

Нашата професија се соочува со сериозни предизвици, ниски примања, сè повеќе притисоци врз новинарите и недоволна заштита. Овој извештај велат од ССНМ, да биде аларм дека без достоинствени услови, нема слободни независни и професионални медиуми.

Пад има во сите пет индикатори, иако, од земјите во регионот, подобро од Македонија се рангирани само Словенија и Црна Гора, а зад нас се Хрватска, Босна и Херцеговина, Албанија, Косово, Бугарија, Грција и Србија.

Глобално, ова е најлош извештај досега – за прв пат во историјата на индексот, состојбата во над половина од земјите во светот е оценета како тешка или многу сериозна.

Александра Спировска