Тензии во Ормус: САД најавуваат интервенција, Иран предупредува на последици

Иран и САД со спротивставени изјави за нападот кај Ормускиот теснец. Тврдењето на Техеран дека погодил американски воен брод беше отфрлено од американската војска. Ова доаѓа само неколку часа откако претседателот Трамп најави дека САД ќе им помогнат на заглавените бродови да излезат од водниот пат. Иран соопшти дека ќе возвратат на сите агресивни дејствија, а бродовите што минуваат низ протокот мора да се координираат со нив.

„Движењето на бродовите има за цел само да ослободи луѓе, компании и земји кои не направиле апсолутно ништо лошо – тие се жртви на околностите. Доколку, на кој било начин, се попречи овој хуманитарен процес, за жал, ќе мора да интервенираме енергично“, изјави американскиот претседател Доналд Трамп.

„Поддржувачите на злонамерните соединети држави треба да бидат претпазливи и да избегнуваат дејствија што би довеле до неповратно жалење. Секој агресивен потег на САД за нарушување на моменталната ситуација само дополнително ќе ги комплицира работите и ќе ја загрози безбедноста на бродовите во оваа област“, изјави ген. Али Абдолахи, командант на централниот штаб на Хатам Ал-Анбија.

Европските челници го поздравија потегот на САД.

„Доколку САД сакаат и се подготвени повторно да го отворат Ормускиот теснец, тоа е одлично. Тоа е она што го бараме од самиот почеток. Сепак, нема да учествуваме во никаква насилна операција во рамка која, според мене, не изгледа јасна“, изјави Емануел Макрон, претседател на Франција.

„Сè што води кон ублажување на блокадата е добредојдено. Од суштинско значење е Ормускиот теснец да се отвори за светската економија и за сите луѓе од тој регион“, рече Мајкл Мартин, премиер на Ирска.

Техеран го разгледува одговорот на САД на својот последен предлог за прекин на војната кој содржи 14 точки. Иран бара укинување на санкциите, прекин на поморската блокада, повлекување на силите од регионот и крај на сите непријателства, вклучително и израелските операции во Либан.

„Можете да претпоставите дека САД не се навикнати да ги напуштат своите прекумерни барања и неразумни очекувања. Затоа, сè уште се справуваме со страна која постојано ги менува своите ставови и покренува прашања што, во пракса, можат да го нарушат секој дипломатски процес“, изјави Есмаил Багаеи, портпарол на МНР на Иран.

Иран негира дека се стреми кон нуклеарна бомба и вели дека програмата е само за мирни цели, иако земјата е единствената држава без нуклеарно оружје што има збогатен ураниум на ниво на оружје.

Катерина Бојаџиева