Мицкоски: Над 15.000 нови работни места за една година
Премиерот Христијан Мицкоски изјави дека во изминатата година се отворени повеќе од 15.000 нови работни места, а невработеноста е на историски најниско ниво.
Претседателот на Владата, Христијан Мицкоски, соопшти дека во последната година се креирани над 15.000 нови работни места, при што бројот на вработени достигнал околу 710.000, додека невработените се под 90.000.
Според него, реалната невработеност е уште пониска, односно под 5 проценти од работоспособното население, што, како што нагласи, претставува историски најниско ниво од независноста на државата.
Мицкоски оцени дека овие резултати се должат на зголемената инвестициска активност и владините мерки за поддршка на стопанството, вклучително и субвенционирани кредити со каматна стапка под 2 проценти.
Тој посочи дека економијата бележи раст од околу 3,5 проценти во последните шест квартали, а номиналниот бруто-домашен производ, според проекциите на Меѓународен монетарен фонд, годинава ќе достигне околу 22 милијарди долари.
Премиерот информираше дека во тек се над 1.200 инфраструктурни проекти низ општините, со вкупна вредност од над половина милијарда евра, кои, како што рече, значително придонесуваат за економскиот раст и отворањето нови работни места.