33-годишен битолчанец со нож ја убил неговата 31-годишна сопруга

Маж уби 31-годишна жена во Битола. Убиството го сторил нејзиниот поранешен сопруг во раните утрински часови додека мајката на неговите деца спиела. По чинот на усмртување со остар предмет пошол во полиција и самиот се предал.

„Дежурен јавен обвинител од Основното јавно обвинителство Битола изврши увид на местото каде што жената била лишена од живот. Издадена е наредба за обдукција на починатата, а од лице место се подигнати траги и материјални докази кои ќе бидат предмет на вештачење. За натамошниот тек на постапката против осомничениот обвинителството ќе ја информира јавноста“, велат од ОЈО Битола.

Роднини и соседи на жртвата во шок и неверување велат дека таа била пријатна личност и добра мајка. Со сопругот имале несогласувања па затоа последната година живееле одвоени. Неофицијално, таа барала помош и од надлежните служби.

Убиената жена живеела со својот татко кој не бил дома за време на несреќниот настан.

Жртвата е единствено дете на родителите, а таа зад себе остави четири малолетни деца.

Од „Женскиот центар за поддршка“-Битола велат се зголемува бројот на пријави на семејно насилство. Годинава помош побарале 11 жени. Мотивот за денешното убиство сега се непознати.

Ружица Аџикотарева Ѓоршевска