Намалени каматите на вкупните кредити и депозити, раст кај новоодобрените кредити
Просечната каматна стапка на вкупните кредити во април изнесувала 4,70 проценти и останала непроменета на месечно ниво, додека кај депозитите е забележано благо намалување, покажуваат најновите податоци на Народната банка. Раст е регистриран кај новоодобрените кредити и кај новопримените депозити.
Просечната каматна стапка на вкупните кредити во април 2026 година изнесувала 4,70 проценти и останала непроменета во однос на претходниот месец, додека на годишна основа е намалена за 0,41 процентни поени, соопшти Народната банка. Просечната каматна стапка на вкупните депозити изнесувала 2,16 проценти и бележи благо месечно и годишно намалување.
Според податоците, просечната каматна стапка на новоодобрените кредити во април достигнала 4,57 проценти, што претставува месечен раст од 0,16 процентни поени и годишен раст од 0,70 процентни поени. Кај новопримените депозити, каматната стапка се зголемила на 2,43 проценти.
Кај корпоративниот сектор, просечната каматна стапка на вкупните кредити изнесувала 4,35 проценти, додека кај новоодобрените кредити достигнала 4,50 проценти. Воедно, каматната стапка на новопримените депозити на корпоративниот сектор се зголемила на 2,74 проценти.
Кај домаќинствата, каматната стапка на вкупните кредити во април се намалила на 5,06 проценти, а кај новоодобрените кредити на 4,65 проценти. Просечната каматна стапка на вкупните депозити на домаќинствата изнесувала 2,10 проценти.