Бензините поевтинуваат за два денари, дизелот поскапува за денар и пол
Од полноќ стапуваат во сила новите цени на горивата што ги утврди Регулаторната комисија за енергетика. Бензините ќе бидат поевтини за два денари по литар, додека дизелот и екстра лесното масло за домаќинство поскапуваат за 1,5 денари.
Регулаторната комисија за енергетика донесе нова одлука за малопродажните цени на нафтените деривати, која ќе почне да се применува од ноќеска на полноќ. Според одлуката, цената на ЕУРОСУПЕР БС-95 се намалува за два денари и ќе изнесува 86 денари за литар, додека ЕУРОСУПЕР БС-98 ќе се продава по цена од 88 денари за литар.
Од друга страна, ЕУРОДИЗЕЛ БС ќе поскапи за 1,5 денари и ќе чини 87 денари за литар, а исто толку поскапува и екстра лесното масло за домаќинство, чија цена ќе изнесува 89 денари за литар. Мазутот поевтинува за 0,609 денари по килограм и ќе се продава по цена од 47,297 денари.
Од РКЕ информираат дека во просек малопродажните цени на нафтените деривати се намалуваат за 0,46 проценти во однос на претходната пресметка.
Како причини за корекцијата на цените се наведуваат движењата на референтните цени на светските пазари на нафта и нафтени деривати, како и промените на курсот на денарот во однос на американскиот долар.