Стопанска комора: Градежништвото бележи тренд на зголемување на активностите

Градежништвото во последниве години бележи тренд на зголемување на активностите. Се зголемува учеството во БДП, се зголемува бројот на вработени. Во 2013 - тата имало вкупно 4.330 градежни компании кои што вработувале околу 45.000 работници.

Како што соопшти денеска Стопанската комора, градежништвото со себе повлекува и други гранки, а тоа придонесува за нивен развој. 

„Радува податокот дека градежништвото подолго време се ангажира во нискоградбата, речиси рамномерно низ целата држава, што беше наша заложба - на патот Смоквица-Демир Капија како дел од Коридорот 10, на автопатите од Миладиновци кон Штип и од Кичево кон Охрид. Ова е предноста што ја баравме, брз проток на стоки и услуги“, истакна денеска на прес-конференција Марија Петроска од Здружението за градежништво при Стопанската комора.

Изградбата на патната инфраструктура, напомена, ќе придонесе и за развој на руралниот туризам за кој во земјава постојат извонредни услови.