Во Драмски театар утре промоција на книгата „Да живее Долна дупка“ од Коле Ангеловски

Драмски театар Скопје утре ќе биде домаќин на промоцијата на книгата „Да живее Долна дупка“ од доајенот на македонската театарска и филмска уметност Коле Ангеловски. Настанот ќе се одржи со почеток во 19 часот, како дел од програмата за одбележување на 80 години од постоењето на театарот.

Публикацијата содржи четири комедии – „Да живее Долна дупка“, „Аферата ‘Рекет’“, „Аферата ‘Ладен шприцер’“ и „Птица со главата меѓу нозе“, напишани во последната деценија. Дел од нив веќе се поставени на сцените на македонските театри и обработуваат актуелни општествени теми преку сатира и хумор.

За книгата ќе говорат директорот на Драмски театар Роберт Вељановски, театарскиот критичар Тодор Кузманов, писателот и драматург Гоце Смилевски, актерите Благоја Чоревски и Ѓокица Лукаревски, како и приредувачот и уредник Свето Стаменов. Во рамки на промоцијата, актерите Жаклина Стевковска и Горан Наков ќе изведат фрагменти од претставата „Да живее Долна дупка“.

Од Драмски театар ги покануваат љубителите на театарот и културната јавност да присуствуваат на настанот и да се запознаат со најновото драмско творештво на Коле Ангеловски.