Нови повисоки цени на горивата од полноќ

Регулаторната комисија за енергетика (РКЕ) ги утврди новите највисоки малопродажни цени на нафтените деривати, кои ќе почнат да се применуваат од ноќеска на полноќ.

Според одлуката, цената на ЕУРОСУПЕР БС-95 ќе изнесува 87,50 денари за литар, ЕУРОСУПЕР БС-98 ќе се продава по 90 денари за литар, додека ЕУРОДИЗЕЛ БС (Д-Е V) ќе чини 87,50 денари за литар. Цената на екстра лесното масло за домаќинство (ЕЛ-1) е утврдена на 86,50 денари за литар, а мазутот М-1 НС на 46,223 денари за килограм.

Од РКЕ соопштуваат дека во просек малопродажните цени на нафтените деривати се намалуваат за 0,10 отсто во однос на претходната пресметка. Сепак, поради промените во акцизите, бензините и дизелот бележат раст на цените.

Така, ЕУРОСУПЕР БС-95 поскапува за 1,50 денари по литар, ЕУРОСУПЕР БС-98 за 2 денари, а дизелот за 0,50 денари по литар. Од друга страна, екстра лесното масло за домаќинство поевтинува за 2,50 денари по литар, додека цената на мазутот се намалува за 1,074 денари по килограм.

Новата одлука е донесена на седницата на РКЕ одржана на 15 јуни и ќе важи до следната корекција на цените на горивата.