Нова инвестиција од 21 милион евра во ТИРЗ Тетово, најавени 550 работни места
Турската компанија CAVO Otomotiv ќе инвестира 21 милион евра во ТИРЗ Тетово, со што ќе бидат отворени околу 550 нови работни места. Од Министерството за економија и труд оценуваат дека инвестицијата е потврда за зголемената доверба на странските инвеститори во македонската економија.
Компанијата CAVO Otomotiv започнува нова инвестиција во Технолошко-индустриската развојна зона Тетово, вредна 21 милион евра, која според најавите ќе обезбеди околу 550 нови работни места.
Министерот за економија и труд Бесар Дурмиши изјави дека инвестицијата претставува значајна потврда за довербата на странските инвеститори во Северна Македонија и за напредокот во создавањето поволна деловна клима.
Станува збор за реномирана мултинационална компанија од автомобилската индустрија, која дел од производството од Турција и Словачка ќе го префрли во земјава. Според Дурмиши, тоа е показател за конкурентноста на домашната економија и квалитетот на работната сила.
Инвестицијата ќе се реализира во ТИРЗ Тетово, единствената индустриска зона во државата што функционира по моделот на јавно-приватно партнерство. Од Министерството очекуваат проектот да придонесе за раст на извозот, отворање нови работни места и дополнителен развој на автомобилската индустрија во земјата.
Во 2025 година компаниите во ТИРЗ Тетово оствариле производство вредно над 6,4 милијарди денари, извоз од речиси 9 милијарди денари и обезбедиле работа за 1.845 лица.