Гаши на средби во Софија, Сиљановска со порака за пресудите

Пресудите на судот во Стразбур, кои се однесуваат на човековите права на Македонците во Бугарија, мора да се испочитуваат, порача претседателката Сиљановска-Давкова. Вели, сите земји членки на Советот на Европа, вклучително и членките на Европската унија, мора да се однесуваат одговорно кон работата и пресудите на овој значаен суд. Овој став, Сиљановска го споделила и при последната посета на Софија.

Во Софија патува и претседателот на македонското собрание, Африм Гаши, кој ќе учествува на Конференцијата на процесот за соработка на земјите од Југоисточна Европа, а на маргините ќе се сретне со бугарската колешка, Михаела Милчева-Доцова, на нејзина иницијатива.

Гаши вели дека тема на средбата ќе биде меѓу парламентарната соработка меѓу Бугарија и Македонија и се надева дека во иднина ќе биде остварена подобра комуникација, која досега беше невозможна, поради како што вели, честите избори во Бугарија и покрај напорите на Македонија.

Треба да разговараме, да одиме напред и да најдеме начин како да бидеме заедно во Европската унија, да нè спојува иднината, а не минатото, истакна Гаши, нагласувајќи дека на средбата во Софија оди со позитивна намера да придонесе во подобрувањето на односите, но и дека македонската позиција останува непроменета. И премиерот Христијан Мицкоски неодамна ја потврди позицијата дека нема пазарење со македонскиот идентитет.

Марија Котовска