Кривични пријави против пет лица за злоупотреби поврзани со ИПАРД средства

Управата за финансиска полиција до Основното јавно обвинителство за гонење на организиран криминал и корупција и до Основното јавно обвинителство Скопје поднесе кривични пријави против Б.Г. и Г.Ф. во својство на надзорни инженери, како и против Е.Н., М.Г. и Н.М., сопственици и управители на две правни лица. Кривични пријави се поднесени и против самите правни лица.

Според соопштението, тие се сомничат за кривични дела „Злоупотреба на службената положба и овластување“, „Фалсификување или уништување на деловни книги“, „Измама на штета на средствата на Европската Унија – во обид“ и „Употреба на исправа со невистинита содржина“.

Финансиската полиција наведува дека пријавените надзорни инженери, спротивно на законските одредби, извршиле технички преглед на објекти и изготвиле завршни извештаи со невистинита содржина, иако објектите не биле завршени. Со тоа им овозможиле на правните лица да ги впишат објектите во Агенцијата за катастар на недвижности.

Сопствениците и управителите на фирмите, иако знаеле дека објектите не ги исполнуваат условите за ставање во употреба, ги употребиле овие извештаи како основ за упис во катастарот со цел да создадат привид дека условите се исполнети и да обезбедат исплата на финансиска поддршка од Програмата за рурален развој во рамки на ИПА 3 – ИПАРД 2021–2027.

Според пријавата, со ваквите дејствија се обиделе да се стекнат со противправна имотна корист во вкупен износ од 50.141.528 денари.