Пожарот кој изби на штипскиот „Исар“ ставен под контрола
Ставен под контрола пожарот на штипски „Исар“, каде пламените јазици се закануваа да ги проголтаат куќите. Жителите во страв излегоа да гаснат за да го спасат имотот, се интервенираше и од воздух. Пожар избувна и кај млекарницата, евакуирани вработените од „Албатрос“. Тешка огнена стихија го зафати и пробиштипско – во Бучиште изгоре куќа. Густиот чад го прекри регионалниот пат Штип – Пробиштип, дојде и до сообраќајната несреќа по судир на две возила. Двајца се повредени.
Пожар го зафати штипски Исар, од пладневните часови со огнената стихија која се закануваше да ги зафати и куќите. Се бореа пожарникарите и доброволците, а интервенираше и ер-тракторот на ДЗС. Нема повредени ниту материјална штета.
Жителите стравуваат од вакви состојби заради тешката пристапност на теренот на противпожарни возила и брза помош.
Пожар претпладне избувна на неколку локации кај Пробиштип. Целосно изгоре куќа кај село Бучиште. Повредени нема, а во гасењето се вклучија и ер-трактори на ДЗС.
Пожарот кај Пробиштип беше причина за сообраќајна несреќа. За да го избегне огнот, автомобил прешол на спротивната лента и директно се судрил со друг автомобил. Повредени се две лица на кои им е укажана лекарска помош во болницата во Штип.
Пожар денес имаше и во населба Чардаклија и во индустриската зона на Штип. Истите се целосно изгасени, како и во Општина Чешиново-Облешево кај село Новоселани, каде гореше ниска вегетација.
Славица Величковска