Македонската берза почнува проект за подготовка на компании за финансирање преку пазарот на капитал
Со поддршка на ЕБРД, Македонската берза денеска официјално го почнува проектот за подготовка на домашните компании за прибирање капитал преку издавање акции и обврзници. Во програмата ќе бидат вклучени до десет компании.
Македонската берза денеска официјално го почнува проектот за поттикнување и подготовка на македонските компании за пазарно финансирање. Проектот се реализира со поддршка на ЕБРД, врз основа на потпишаниот Меморандум за соработка, а ќе го спроведуваат PWC Северна Македонија и PWC Хрватска.
Во рамки на проектот, до десет компании ќе добијат професионална и независна проценка на нивната подготвеност за пристап до пазарот на капитал преку издавање акции или обврзници. Тие ќе учествуваат и на специјална лидерска академија, како и ќе добијат конкретни препораки за понатамошна подготовка за обезбедување финансиски средства преку пазарот на капитал.
Од Македонската берза очекуваат проектот да придонесе за создавање нови финансиски инструменти и нови издавачи на македонскиот пазар на капитал, со што ќе се поттикне неговиот понатамошен развој.