Багер сруши дел од куќа додека станарите спиеле
Градежна механизација во четири часот утринава во Штип почнала да руши куќа во која спиеле двајца браќа. За среќа нема повредени, но вознемиреноста од настанот е голема. Полицијата трага по сторителот …
Силен тресок на рушење на дел од куќа во која живеат двајца браќа во социјален ризик утринава во четири часот ги разбуди жителите на улиците „Димо Хаџи Димов“ и „Првомајска“ во Штип. Багер со два удари го срушил напуштениот дел од куќата.
Полициската истрага треба да го лоцира сторителот, настанот е забележан и од соседите и од надзорните камери. Според општинскиот градежен инспектор објектот не е на списокот за рушење. Од ЈП „Стипион“ се децидни дека багерот не е нивен.
Надлежните општински инспектори извршија увид на објектот.
„По извршениот увид и на основа на добиените документи од Агенција за катастар, се утврди дека посочениот објект нема сопственик и лицето кое дава изјава пред медиумите, не располага со документ за негово право на сопственост или користење. Општината ќе пристапи кон чистење на наведената локација за обезбедување пристапност низ улицата и расчистување на теренот, со цел граѓаните да немаат потешкотии во извршувањето на секојдневните обврски“, соопштија од Општина Штип.
Браќата Сефери се загрижени за сопствената безбедност бидејќи куќата сега е со нарушена стабилност.
Славица Величковска