Како да ги заштитите бебињата кога температурите се екстремно високи?

На бебињата, малите деца и децата од предучилишна возраст им е потребно време на отворено за правилен физички и ментален развој, но истовремено тие бараат и дополнителна грижа кога времето е многу топло.

Во текот на летото, ова често предизвикува загриженост кај родителите. Колку долго децата треба да престојуваат надвор? Како да знам дека се добро? Што треба да избегнувам?

Климатските промени предизвикани од човекот придонесуваат топлотните бранови да бидат подолги, посилни и почести. Голем дел од Соединетите Американски Држави минатата недела беше погоден од таканаречена „топлинска купола“.

Според д-р Кетрин Вилијамсон, педијатар во детската болница „Рејди Чилдренс Хелт“ во Оринџ, Калифорнија, поради овие промени прашањето за безбедноста на бебињата во екстремни горештини станува сè поактуелно.

„Со родителите разговараме за опасностите од давење и задушување кај малите деца, а сега сè почесто зборуваме и за ризиците од жештината. Таа станува сè почеста причина за можни повреди и здравствени проблеми“, вели таа.

Зошто децата се почувствителни на високите температури?

Децата се потат помалку од возрасните, а нивниот метаболизам е побрз, што значи дека нивното тело побрзо се загрева. При екстремно високи температури, нивниот поголем однос меѓу површината на телото и телесната маса овозможува побрзо впивање на топлината.

Освен тоа, децата обично поминуваат повеќе време на отворено.

Во жешките денови родителите треба внимателно да ги следат знаците што укажуваат на заболувања поврзани со топлината. Недостатокот на солзи при плачење или пореткото мокрење и помалиот број мокри пелени може да бидат знак дека бебето е дехидрирано. Родителите треба да ги хранат бебињата почесто, но со помали количини, за да внесуваат доволно течности.

Иако не мора секогаш да укажуваат на болест, заморот и зацрвенетата кожа најчесто се знак дека детето треба да се разлади. Д-р Вилијамсон додава дека и зголемената раздразливост може да биде показател дека на детето му е премногу топло.

Совети за безбедност во летните горештини

Избегнувајте престој на отворено во најтоплиот дел од денот. Облекувајте ги децата во лесна, широка и светла облека, нанесувајте крем со заштитен фактор и обезбедете да внесуваат доволно течности. Овошјето богато со вода, како што се лубеницата и јагодите, е одличен избор за ужина во жешките денови.

„Ако вам ви е жешко, сигурно му е жешко и на вашето бебе“, вели д-р Дебра Ленглоа, педијатар во Детската болница „Ц. С. Мот“ при Универзитетот во Мичиген.

Таа советува родителите и другите старатели да го ограничат времето што бебињата и малите деца го поминуваат надвор кога е многу топло, но не препорачува тие целосно да останат во затворен простор.

Не покривајте ја детската количка со ќебе

Овој совет можеби звучи необично. На прв поглед изгледа логично да се покрие количката за да се заштити детето од сонцето.

Но, ќебињата и другите прекривки, дури и ако се тенки, го спречуваат струењето на воздухот и ја задржуваат топлината, поради што температурата во количката може значително да се зголеми. Наместо тоа, користете ја сенката што ја обезбедува настрешницата на количката.

Д-р Вилијамсон исто така препорачува родителите да ги проверуваат металните делови на количката, бидејќи тие можат силно да се загреат и да предизвикаат изгореници кај детето.

Никогаш не оставајте дете само во автомобил

Дури и кога автомобилот е паркиран во сенка и прозорците се малку отворени, температурата во него може многу брзо да се искачи на опасно високо ниво. Според американската Национална администрација за безбедност во сообраќајот на патиштата, во 2025 година 31 дете починало од топлотен удар откако било оставено во возило.

Агенцијата препорачува родителите и старателите да остават чанта или друг личен предмет на задното седиште, да постават белешка или плишана играчка на совозачкото седиште како потсетник дека детето е во автомобилот.

Кога ќе се вратите до паркираниот автомобил со вашето бебе во жежок ден, проверете дали металните делови на детското седиште не се премногу жешки. За поголема удобност, користете заштита од сонце за шофершајбната за да ја одржите внатрешноста поладна и вклучете ја климатизацијата пред да го сместите детето во возилото.

За побрзо разладување на загреаниот автомобил, експертите препорачуваат прозорците да се отворат 10 до 20 секунди додека климатизацијата работи.

Извор: Асошиетед прес | Фото: Пиксабеј