Крушевчани чекаат да пијат здрава вода
Крушево нема исправна вода за пиење. граѓаните се снаоѓаат како знаат и умеат, а во прилепскиот Центар за јавно здравје анализираат – деновиве водата е забранета за употреба, промена на состојбата се очекува од вторник. Епидемиолошката состојба е стабилна…
Пакувана вода, изворски чешми. Кој како знае и умее. Крушевчани деновиве се снаоѓаат со вода за пиење и за дневните потреби откако анализите покажаа дека водата од градскиот водовод е бактериолошки неисправна. Се снаоѓаат и очекуваат за брзо да се поправат состојбите.
Од прилепскиот центар за јавно здравје велат дека пред празниците редовно ги зачестуваат контролите. Реагирале правовремено, по првичните резултати пред да ги чекаат конечните. Водата не е за пиење и за домашна употреба сè додека не се земат три последователни примери по препораките да се надмине отсуството на резидуален хлор во водата за пиење.
До вторник се очекува да стигнат новите резултати за исправноста на водата за пиење во Крушево.
Елизабета Митреска