Архивски документи и фотографии од Илинденското востание
По повод 2 Август – Илинден, Државниот архив претстави избор на архивски документи и фотографии кои сведочат за Илинденското востание, борбата на македонските револуционери и создавањето на Крушевската Република.
По повод Денот на Републиката – 2 Август, Државниот архив објави избор на архивски документи и фотографии од своите фондови и збирки, посветени на Илинденското востание од 1903 година и неговото историско значење.
Од Архивот потсетуваат дека на денешен ден во 1903 година започнало Илинденското востание – еден од најзначајните настани во македонската историја, кога македонските револуционери, водени од идеалите за слобода и сопствена држава, ја започнале борбата што оставила траен белег во колективната меморија на народот.
Во објавата се истакнува дека Крушевската Република останува најсилниот симбол на стремежот кон слобода, еднаквост и праведно општество, додека архивските документи и фотографии сведочат за борбата, идеалите и жртвата на илинденците и претставуваат драгоцен дел од македонското историско наследство.
„Нека е честит Илинден! Вечна слава на хероите на Илинденското востание!“, порачуваат од Државниот архив.