Нова ранг-листа на ФИВБ: Македонија падна за едно место
Најновата ранг-листа на ФИВБ донесе неколку промени по завршувањето на Лигата на нации. Македонската машка одбојкарска репрезентација забележа мал пад и сега се наоѓа на 54. место во светот.
По завршувањето на Лигата на нации беа направени корекции на светската ранг-листа на ФИВБ, при што Македонија падна за една позиција во однос на претходното рангирање.
Причина за падот на Македонија на августовската листа е напредокот на Австралија, која се искачи од 54. на 52. место.
На врвот на светската ранг-листа нема промени. Полска, која ја освои Лигата на нации, останува на првата позиција, пред Италија и Русија. Во првите пет се наоѓаат уште Словенија и Соединетите Американски Држави.
Бугарија, која ќе биде првиот противник на Македонија на претстојното Европско првенство, останува на деветтото место на светската ранг-листа.
За едно место назадуваше и Косово, кое сега се наоѓа на 126. позиција, додека Албанија го задржа 79. место.