ЦУК: Изгаснати сите 22 пожари на отворено регистрирани до утринава
До 7:30 часот утринава во земјава биле регистрирани 22 пожари на отворен простор, но сите се изгаснати и во моментов нема активни пожари, соопшти Центарот за управување со кризи.
Во изминатото деноноќие, заклучно со 7:30 часот утринава, во државата биле евидентирани вкупно 22 пожари на отворен простор, а сите се успешно изгаснати, информира Центарот за управување со кризи (ЦУК).
Според информациите, нема активни пожари, ниту пожари кои се ставени под контрола, бидејќи сите интервенции се завршени.
Пожарите биле регистрирани на повеќе локации низ државата, меѓу кои во општините Чучер Сандево, Карпош, Гази Баба, Ѓорче Петров, Битола, Прилеп, Струга, Крива Паланка, Тетово, Желино, Кавадарци, Куманово, Центар, Арачиново и Гостивар. Најчесто гореле сува трева, ниска вегетација, грмушки, депонии и деградирана шума.
Од ЦУК апелираат граѓаните да бидат внимателни и да ги почитуваат мерките за заштита од пожари, особено во услови на високи температури и зголемен ризик од нивно избувнување.