Под лупа лекувањето во странство и боледувањата

Лекувањето во странство во фокус на новиот директор на Фондот за здравство, Златко Перински. Вели, годишно се трошат 500 милиони денари, а институцијата нема податок за исходот од лекувањето. Процедурата за испраќање на пациенти оди преку три сектори во Фондот и затоа посебно тело ќе треба да ги сумира сите податоци.

Лекувањето во странство како проблем е нотирано во сите извештаи на државниот ревизор, но напредок не е направен, рече новиот директор Перински. Неговиот претходник, а актуелен министер Клековски направил посебно тело кое требало да работи на овој проблем, но без резултат.

„Ќе се формира тим од вработени во Фондот кои ќе ги следат парите, документите и начинот на лекување во странство за да ја знаеме ефикасноста“, вели Перински.

Боледувањата кои се подолги од 30 дена и паѓаат на сметка на Фондот ќе бидат предмет на ревизија и ќе се бара решение. А, во колку неблагодарна позиција се наоѓаат лекарите кои се ангажирани во комисии за продолжување на боледувањата говори фактот што морало да биде ангажирано и обезбедување.

Перински вели – не е целта некому да се скрати правото на боледување, туку боледувањата да бидат основани. Особено под лупа ќе бидат оние боледувања коишто траат со години. Околу 12% од буџетот на Фондот за здравство се одлеваат за боледувања.

Наташа Јанчиќ-Менковски