Груевски: Владата ќе продолжи со жестоко темпо да работи за подобрување на животниот стандард

Има пари во Буџетот за повисоки плати на администрацијата. Со октомвриската исплата следува зголемување од 4%. Следната година ќе донесе и повисоки пензии и повеќе пари за најранливите категории граѓани, рече премиерот Груевски во отчетното обраќање.

„Иако во многу земји владите прават одлуки спротивни на нашата, но ние донесовме одлука и предвидовме средства во буџетот за зголемување на платите на администрацијата за 4 проценти, започнувајќи од октомвриската плата која се исплаќа во ноември. Донесена е одлука и предвидени се средства во буџетот за 2015 година да продолжи зголемувањето на пензиите и да биде за пет проценти следната година“, рече премиерот Груевски.

Првите 100 дена од конституирањето на владинот кабинет донесоа и бесплатен одмор за 2.000 деца. Се отпишаа долгови за најсиромашните, и се намалија каматите за субвенционирано купување куќа или стан. Изградени се две спортски сали, три основни и едно средно училиште, а реконструирани се уште 27, информираше првиот човек на Владата.

Лековите сега се достапни и за граѓаните од помалите места, а почнаа и првите кардиохируршки интервенции во значително подобрена болничката инфраструктура. Груевски најави дека набрзо ќе се гради новиот Клинички центар, а 70 млади доктори бесплатно ќе специјализираат во странство.

„Воведен е бесплатен превоз со железничкиот сообраќај и за повозрасни лица, жени над 62 и мажи над 64 години, секој втор викенд во месецот, бесплатен железнички превоз за млади до 27 години секој трет викенд во месецот, бесплатен железнички превоз за студенти секој четврток и попуст од 50 проценти за железничкиот превоз за ученици и студенти, секој ден“, рече премиерот Никола Груевски.

74 илјади земјоделци кои аплицирале за државни субвенции ќе добијат помош, рече Груевски, а изготвен е и календар со предвидена динамика за исплата на парите.

Анита Димитријевска