Почина Дон Нелсон, легендата на НБА лигата

Легендарниот американски кошаркар и тренер Дон Нелсон почина на 87-годишна возраст, потврди неговото семејство.

„Во неделата, нашиот сакан сопруг, татко, дедо и прадедо Дон Нелсон мирно почина кај Господ, опкружен со своето семејство. Во текот на претходната недела, семејството и пријателите го опкружуваа со љубов, споделувајќи го благословот на неговото пријателство и прекрасни спомени“, се наведува во соопштението на семејството.

Нелсон остави огромен белег во НБА лигата и се смета за легенда во најелитната американска кошаркарска лига. Речиси 12 години, тој го држеше рекордот по број на тренерски победи со 1.335, пред Грег Попович да го престигне на врвот.

За време на својата кариера, Нелсон ги водеше тимовите на Милвоки Бакс, Њујорк Никс, Далас Маверикс и Голден Стејт Вориорс, каде што беше последен тренер од 2006 до 2010 година.

Три пати беше прогласен за најдобар тренер во НБА лигата – во 1983, 1985 и 1992 година – и двапати го водеше тимот до натпреварот на ѕвездите.

Во 1994 година, Нелсон беше и тренер на репрезентацијата на Соединетите Американски Држави, која освои злато на Светското првенство во Торонто.