„Џез-вечери“ од 13 до 16 август во рамки на „Охридско лето“

Во рамки на фестивалот „Охридско лето“, од 13 до 16 август, ќе се одржи првото издание на „Џез-вечери“. Оваа манифестација ќе се реализира во амбиентот на црквата  „Света Софија“ и на сцената на Долни Сарај.

Програмата предвидува шест концерти со настапи на музичари од САД, Германија, Грција, Гана, Холандија, Велика Британија и од Македонија. Меѓу изведувачите се и Крсте Роџевски, Дине Донеф трио, Нубаја Гарсија и „Kiioto“.

Програмата ќе биде отворена на 13 август во црквата „Света Софија“, со концертна промоција на албумот „Orthodoxia Kai Thanatos“ на Крсте Роџевски, македонски пејач, гитарист и композитор, кој е активен на авангардната „даунтаун“ сцена во Њујорк уште од неговата преселба во градот во доцните деведесетти години на минатиот век.

На концертот, Роџевски ќе настапи со Христијан Моневски и со Дамјан Палоски на вокален исон, како и со Андреа Мирческа и со Оливер Јосифовски на контрабас, во улога на инструментален исон.

Истата вечер ќе се одржи и концерт на Дине Донеф со неговото трио, во кое настапуваат Харис Ламбракис на неј и на оргули и Кирјакос Тапакис на уд. Дине Донеф (Костас Теодору) е композитор, контрабасист, мултиинструменталист, едукатор и автор со препознатлив музички јазик.

Финален концерт на „Џез вечери“, на 16 август ќе има британскиот состав „Kiioto“, оригинален музички проект на двете етаблирани музички имиња Лу Роудс и Роан Хит, кои носат современ и автентичен авторски пристап.