38. издание на „Поетска ноќ во Велестово“ со поети и уметници од седум земји

Во петок, 21 август, започнува 38. издание на „Поетска ноќ во Велестово“, манифестација која со децении ги поврзува поезијата, музиката и визуелната уметност во автентичниот амбиент на Велестово и Охрид.

Програмата ќе започне во 21 часот со поетски портрет на Јовица Ивановски, по што ќе следува интернационалното поетско читање „Имаго“. Во 22:30 часот ќе биде отворена изложбата на акварели „Флора“ од Ивана Настески.

Во следните два дена се предвидени промоции на пет поетски збирки и интернационалните читања „Мозаик“, со учество на автори од Ирска, Хрватска, Србија, Црна Гора, Бугарија, Романија и Македонија.

Музичкиот дел од програмата го носат Иван Христов и Петар Чухов, а фестивалските активности ќе бидат дополнети со организирано разгледување на културно-историското наследство на Охрид и природните убавини на Галичица.

Манифестацијата, основана од поетот Славе Ѓорго Димоски, ќе се одржува до 23 август, со програмски активности во Велестово и во „Лапидариумот“ во Охрид.