Водата за пиење во Скопје безбедна, покажуваат 422 анализи
Сите испитани примероци вода за пиење во Скопје во периодот од 10 до 14 август одговараат на пропишаните стандарди за безбедност и квалитет, соопшти ЈП „Водовод и канализација“ – Скопје.
Во периодот од 10 до 14 август, Секторот за санитарна контрола при ЈП „Водовод и канализација“ – Скопје зел 211 примероци за физичко-хемиска и исто толку за микробиолошка анализа. Примероците се земени од 45 мерни места на територијата на Град Скопје.
Според добиените резултати, сите 422 анализирани примероци одговараат на Правилникот за барања за безбедност и квалитет на водата за пиење.
Од ЈП „Водовод и канализација“ посочуваат дека неделниот лабораториски извештај се објавува со цел граѓаните редовно да бидат информирани за квалитетот и безбедноста на водата за пиење во Скопје.