Унгарска вечер на „Охридско лето“ со Ноеми Салаи и Александра Балог

Музичката програма на годинешното 66. издание на фестивалот „Охридско лето“ продолжува со Унгарската вечер и целовечерен концерт на кларинетистката Ноеми Салаи и пијанистката Александра Балог.

На концертот ќе бидат изведени дела од Роберт Шуман, Мате Бела, Золтан Кодај, Реже Кокаи и Бела Барток, во програма во која се преплетуваат германскиот романтизам и унгарската музичка традиција.

Ноеми Салаи е добитничка на повеќе меѓународни награди, а од 2018 до 2020 година била единствената кларинетистка избрана за престижната програма „Ансамбл конект“ на „Карнеги Хол“. Настапувала со Унгарскиот фестивалски оркестар под диригентство на Иван Фишер, како и со повеќе реномирани ансамбли во САД и Европа. Дипломирала на колеџот „Бард“, а магистрирала на „Џулијард“ во Њујорк.

Пијанистката Александра Балог е победничка на Меѓународниот натпревар за пијанисти „Бела Барток“ во Грац во 2017 година, добитничка на „Фулбрајт“ стипендија и на наградата „Прима“ за млади уметници во Унгарија. Во 2024 година беше вброена и на листата „30 под 30“ на „Форбс“ – Унгарија.

Како солист, Балог настапувала во престижни концертни сали, меѓу кои „Карнеги Хол“ во Њујорк, салата на Конзерваториумот „П. И. Чајковски“ и Центарот за уметности во Мексико Сити.

Во текот на оваа концертна сезона таа ќе настапи и во Париз, Лондон, Токио, Сингапур, Пекинг и Шангај.

Балог е основач и уметнички директор на Уметничкиот колектив „Аталена“, кој обединува млади музичари од различни земји и организира фестивали, академии и мајсторски курсеви во Унгарија и Италија.