Полска вечер на „Охридско лето“ со „Глам квартет“ и Стен Брекенриџ
На концертот публиката ќе има можност да слушне дела од Фредерик Шопен во нови аранжмани на Брекенриџ, кои на познатите композиции им даваат џез и современ музички израз.
Музичката програма на 66. издание на „Охридско лето“ вечерва продолжува со Полската вечер. Во црквата „Света Софија“ ќе настапат полскиот „Глам квартет“ и американскиот пијанист, композитор и предавач Стен Брекенриџ.
На концертот публиката ќе има можност да слушне дела од Фредерик Шопен во нови аранжмани на Брекенриџ, кои на познатите композиции им даваат џез и современ музички израз.
„Глам квартет“ го сочинуваат четири реномирани полски инструменталистки – Барбара Шелчаеиевич на прва виолина, Доминика Пјечовјак-Должинска на втора виолина, Каролина Вашцинска-Лукановска на виола и Агњешка Ковалчук на виолончело.
Нивниот репертоар опфаќа различни музички стилови – од класика, поп, рок и џез, до современи алтернативни жанрови. Членките на квартетот настапуваат како солистки, камерни музичарки и членки на симфониски оркестри, а соработувале и со бројни полски и светски музички имиња.
Во првиот дел од концертот ќе бидат изведени „Swinging Nocturne in E-flat Major“, „Prelude in C minor“, „Fantasy Impromptu in Bossa Nova Style“, „Andante spianato in Waltz Style“ и „Swinging Prelude in C Major“.
Во вториот дел, Брекенриџ ќе ги претстави своите авторски композиции, но и нови аранжмани на познати песни, меѓу кои „What a Wonderful World“, „Stand by Me“ и „Can’t Take My Eyes Off You“.
Американскиот пијанист и автор зад себе има меѓународна кариера со настапи и предавања во Европа, Азија, Африка и Северна Америка, како и три книги посветени на музиката.