ТикТок влијае врз апетитот и навиките во исхраната кај младите

Содржините поврзани со храна на ТикТок можат да предизвикаат чувство на глад кај тинејџерите, покажува ново истражување. Иако начинот на кој младите ги користат медиумите постојано се менува, влијанието на визуелните содржини врз апетитот и желбата за храна и натаму е значително.

Истражувањето, објавено во научното списание „Journal of Nutrition Education and Behavior“, анализира како видеоснимките со храна на ТикТок влијаат врз навиките во исхраната кај припадниците на генерацијата З.

Истражувачи од Универзитетот во Минесота разговарале со 25 тинејџери на возраст од 15 и 16 години за содржините што им се прикажуваат на ТикТок. Учесниците посочиле дека системот за препорачување содржини постојано им нуди видеоснимки поврзани со храна.

Меѓу нив има кратки и забрзани прикази на рецепти, оценки на ресторани од други градови, популарни предизвици поврзани со храна, како и видеоснимки во кои корисниците покажуваат што јадат во текот на еден ден.

Системот на ТикТок брзо го препознава интересот на корисникот за одредена тема и почнува да му прикажува сè повеќе слични содржини на страницата со препорачани видеоснимки.

Тинејџерите вклучени во истражувањето велат дека гледањето храна речиси веднаш им создава желба да јадат. Тоа се случува дури и кога станува збор за јадења од ресторани во други градови или држави, кои не им се непосредно достапни.

Влијанието може да биде уште поголемо кога храната ја препорачуваат познати и популарни корисници на ТикТок, бидејќи нивната препознатливост кај младите создава поголема доверба во содржината.

Сепак, учесниците во истражувањето навеле дека најчесто можат да препознаат кога станува збор за платена реклама или промотивна содржина.

Иако резултатите укажуваат дека системот за препорачување содржини може силно да влијае врз изборот на храна, улогата на родителите и семејството останува значајна.

Тинејџерите посочиле дека заедничките семејни оброци и активностите надвор од мрежите им помагаат да се оддалечат од телефонот. Отворените разговори за исхраната и изгледот на телото, исто така, можат да им помогнат покритички да ги восприемаат содржините што ги гледаат.

Авторите нагласуваат дека станува збор за почетно истражување спроведено врз мала група испитаници и дека резултатите се засноваат на нивните лични искуства и согледувања.

Во истражувањето не била мерена вистинската количина и видот на храната што ја консумирале тинејџерите, ниту, пак, била утврдена директна причинско-последична врска меѓу времето поминато на ТикТок и нивните навики во исхраната.

Сепак, резултатите укажуваат дека постојаната изложеност на видеоснимки со храна може да ја зголеми желбата за јадење и да влијае врз изборот на храна кај младите.