Лука Дончиќ ќе работи со Гешвинднер, тренерот кој е заслужен за претпознатливиот шут на Дирк Новицки

Лука Дончиќ ова лето очигледно не остава ништо на случајноста. Суперѕвездата на Лос Анџелес Лејкерс започна со подготовките за новата сезона во родната Словенија, а на неговите тренинзи се појави и човекот кој има огромна заслуга за развојот на шутот на легендарниот Дирк Новицки.

Холгер Гешвинднер, долгогодишниот тренер, ментор и советник на Новицки, беше забележан на миникампот на Лејкерс во Љубљана. Германецот најпрво присуствувал на тимската вечера, а потоа од трибините го следел и тренингот во Стожице.

Неговото присуство веднаш го привлече вниманието на американските новинари. Познатиот НБА инсајдер Марк Стајн објави дека 80-годишниот Гешвинднер не бил само гостин, туку и започнал да работи со Лука Дончиќ на дополнително унапредување на неговата игра.

Најпознат е по повеќедецениската соработка со Дирк Новицки. Гешвинднер му бил тренер, ментор и советник на Новицки, а неговиот печат особено се гледа во шутот што со години беше заштитен знак на германската легенда.