На денешното рочиште презентирани податоци од телефонот на Ристов
Продолжи судењето против апелацискиот судија Ѓоко Ристов во чија семејна куќа беа најдени 350.000 евра соѕидани во ѕид. На Ристов му се суди за противправно стекнување и прикривање имот и за перење пари. На судењето беа презентирани и податоци од телефонот на Ристов. Контакти и комуникации со лица за кои се водат судски процеси, адвокати, бизнисмени.
Суспендираниот апелациски судија Ѓоко Ристов и неговата сопруга располагале со 600, а неговите родители со 950 илјади евра, покажа финансиското вештачење. Но, сепак и покрај овие приливи, обвинетиот не може да ја оправда сумата соѕидана под плочките во кујната, смета Обвинителството. Одбраната пак тврди дека парите биле заработени законски, а тоа ќе го докажеле со сопствено вештачење.
На судењето беа презентирани и податоци од телефонот на Ристов. Контакти и комуникации со лица за кои се водат судски процеси, адвокати, бизнисмени. Според одбраната, овие докази на Обвинителството немаат вредност, бидејќи како што велат – имањето на броеви на конкретни луѓе во телефонот не е кривично дело.
На Ристов му се суди за противправно стекнување и прикривање имот и за перење пари. При претрес на домот на неговите родители беа пронајдени 350 илјади евра смотани во фолии и соѕидани. Обвинителството тврди дека се стекнати незаконски.
Судењето продолжува со изведување на материјални докази.
Ана Јосифоска