Продолжен притворот за сопственикот на „Пулс“

Притворот за првообвинетиот во случајот „Пулс“, Дејан Јованов е продолжен до 3-ти октомври годинава, соопшти Основниот кривичен суд Скопје. Одлуката е донесена од Кривичниот совет, со образложение дека обвинителниот акт е оценет на 3-ти октомври 2025 година, а законскиот рок за притвор може да трае најмногу една година од оцената на обвинителниот акт. По истекот на рокот за притвор, судот по службена должност ќе определи дополнителни мерки за претпазливост, со цел да се обезбеди непречено присуство на Јованов во понатамошниот тек на судската постапка. Во моментов, активен куќен притвор имаат обвинетите Јане Јанчевски и Ивица Гроздановски. За Јанчевски е прифатено укинување на куќниот притвор со гаранција од над 33 илјади евра во недвижен имот.

Откако ќе заврши впишувањето на имотот под хипотека, тој ќе биде пуштен од куќен притвор, но ќе има дополнителни мерки за претпазливост. Куќниот притвор претходно им е заменет со мерки за претпазливост и на Митко Стојанов, Мартин Ѓорѓиев и Стојанчо Димитриев.

За Тодор Јованов и Беким Хаџиу, пак, куќниот притвор е укинат со определени гаранции во недвижен имот. Од Основниот кривичен суд Скопје велат дека обвинетите на кои им е укинат куќниот притвор ги почитуваат определените мерки и редовно се појавуваат на закажаните судски рочишта.

Родителите на загинатите деца пак стравуваат дека бавноста на судскиот процес може да создаде шанса обвинетите да станат недостапни за органите на прогонот.