Хутите го зазедоа градот Мока и го загрозуваат теснецот Баб ал-Мандеб

Нова ескалација во Јемен. Хутите, поддржани од Иран, по жестоки борби со владините сили, ја презедоа контролата врз пристанишниот град Мока и островот Зукар, во близина на теснецот Баб ел-Мандаб, клучен премин за светската трговија. Обединетите нации предупредуваат дека ситуацијата може да го вовлече Јемен во поширок регионален конфликт.

„Оваа нова војна треба да нè загрижи сите. Таа го означува крајот на релативниот мир во Јемен и ризикува да ја вовлече земјата во поширокиот регионален конфликт, со глобални последици“, изјави Ханс Грундберг, специјалниот пратеник на ОН за Јемен.

Развојот доаѓа во услови на зголемени тензии меѓу Иран и САД и ја зголемува загриженоста за безбедноста на пловидбата. Во меѓувреме, израелскиот премиер Нетанјаху обвини дека Иран повторно се обидува да развие нуклеарно оружје.

„Ви ветувам дека, сè додека сум премиер, Иран нема да има нуклеарно оружје“, изјави израелскиот премиер Бенјамин Нетанјаху.

Меѓународната агенција за атомска енергија го пријави Иран пред Советот за безбедност на ОН поради недоволна соработка во истрагата за неговата нуклеарна програма.