ВМРО-ДПМНЕ и Вреди со одделни кандидати за градоначалник на Брвеница
Владините коалициски партнери ВМРО-ДПМНЕ и Вреди ќе настапат со одделни кандидати на вонредните локални избори за градоначалник на Брвеница. ВМРО-ДПМНЕ го кандидира Стојанчо Радичевски, Вреди - Јакуп Хусеини, додека кандидат на Демократската унија за интеграција ќе биде Аркин Јахији. Изборите се закажани за 18 октомври.
Владините коалициски партнери ВМРО-ДПМНЕ и Вреди ќе настапат со одделни кандидати за градоначалник на Брвеница. Актуелниот претседател на Општинскиот комитет на ВМРО-ДПМНЕ во Брвеница, Стојанчо Радичевски, едногласно е избран од Извршниот комитет на партијата за кандидат за прв човек на општината.
Кандидат на Вреди на претстојните вонредни локални избори е Јакуп Хусеини, додека Демократската унија за интеграција ќе настапи со Аркин Јахији.
Изборите за градоначалник на Брвеница, претседателот на Собранието, Африм Гаши, ги распиша за 18 октомври. Вонредните избори ќе се одржат откако во јуни годинава, на 58-годишна возраст, почина градоначалникот на општината, Ивица Илиевски.
Функцијата градоначалник привремено ја извршува досегашниот претседател на Советот на Општина Брвеница, Роберт Милошески.